రాగం : గౌలిపంతు - రామ నీ నామ మేమి రుచిరా

రాగం : గౌలిపంతు - రామ నీ నామ మేమి రుచిరా 

ఓ రామ నీ నామ మేమి రుచిరా
శ్రీరామ నీ నామ మేమి రుచిరా || ఓ రామ ||

కరిరాజ ప్రహ్లాద ధరణి విభీషణుల
గాచిన నీ నామ మేమి రుచిరా || ఓ రామ ||

కదళీ కర్జూరాది ఫలముల కధికమౌ
కమ్మన నీ నామ మేమి రుచిరా || ఓ రామ ||

నవరసములకన్న నవనీతములకంటె
అధికమౌ నీ నామ మేమి రుచిరా || ఓ రామ ||

పనస జంబూ ద్రాక్ష ఫలరసములకంటె
అధికమౌ నీ నామ మేమి రుచిరా || ఓ రామ ||

అంజనతనయు హృత్కమలంబునందు
రంజిల్లు నీ నామ మేమి రుచిరా || ఓ రామ ||

శ్రీ సదాశివుడు తా నేవేళ భజియించు
శుభరూప నీ నామ మేమి రుచిరా || ఓ రామ ||

సారములేని సంసార తరుణమునకు
తారకము నీ నామ మేమి రుచిరా || ఓ రామ ||

శరణన్న జనులను సరగున రక్షించు
బిరుదుగల్గిన నామ మేమి రుచిరా || ఓ రామ ||

తంబురనారదుల్ డంబమీరగ గా
నంబు చేసెడి నామ మేమి రుచిరా || ఓ రామ ||

అరయ భద్రాచల శ్రీ రామదాసుని
ఏలిన నీ నామ మేమి రుచిరా || ఓ రామ ||