రాగం : కర్ణాట -సా విరహే తవ దీనా
సా విరహే తవ దీనా ॥
అవిరళ నిపతిత మదన శరాదివ భవదవనాయ విశాలం
స్వహృదయ మర్మణి వర్మ కరోతి సజల నళినీదళజాలమ్‌ ॥
కుసుమ విశిఖ శర తల్పమనల్ప విలాస కలా కమణీయం
వ్రతమివ తవ పరిరంభ సుఖాయ కరోతి కుసుమ శయనీయమ్‌ ॥
వహతి చ వలిత విలోచన జల ధరమానన కమలముదారం
విధుమివ వికట విధుంతుద దంత దళన గలితామృత ధారమ్‌ ॥
విలిఖతి రహసి కురంగ మదేన భవంతమసమ శర భూతం
ప్రణమతి మకరమధో వినిధాయ కరే చ శరం నవ చూతమ్‌ ॥
ధ్యాన లయేన పురః పరికల్ప్య భవంతమతీవ దురాపం
విలపతి హసతి విషీదతి రోదితి చంచతి ముంచతి తాపమ్‌ ॥
ప్రతిపదమిదమపి నిగదతి మాధవ! తవ చరణే పతితాఽహం
త్వయి విముఖే మయి సపది సుధానిధిరపి తనుతే తను దాహమ్‌ ॥
శ్రీ జయదేవ భణిత మిదమధికం యది మనసా నటనీయం
హరి విరహాకుల వల్లవ యువతి సఖీ వచనం పఠనీయమ్‌ ॥
No comments:
Post a Comment