గరుడగమన రారా నను

గరుడగమన రారా నను
నీ కరుణ నేలుకోరా
పరమపురుష ఏ వెరపులేక నీ
మరుగుజొచ్చితిని అరమర సేయకు // పల్లవి //

పిలువగానే రమ్మి
అభయము తలపగానే యిమ్మి
కలిమిబలిమి నాకిలలో నీవని
పలవరించితిని నలువను గన్న // గరుడ //

పాలకడలి శయనా దశరథ
బాల జలజ నయనా
పాలముంచినను నీటముంచినను
పాలబడితినిక జాలము సేయకు // గరుడ //

ఏలరావు స్వామీ నను
నీవేలుకోవదేమి
ఏలువాడవని చాలనమ్మితిని
ఏలరావు కరుణాలవాల హరి // గరుడ //

ఇంత పంతమేల
భద్రగిరీశ వరకృపాల
చింతలణచి శ్రీరామదాసుని
అంతరంగపతివై రక్షింపుము // గరుడ //